Visit Aru taqbaylit

Awal/Blog

Azul fell-awen

Amaynut: ARUT TAQBAYLIT d amkan anda ara ttemlilen Yiqbayliyen..

 

Visit Aru taqbaylit

Aẓeṭṭa-ayi yettwaxleq-d ilmend

 

n useqdec n teqbaylit

 

deg kra yellan taɣult, abeεda deg internet.

 

Isumar-nwen anṣuf yes-sen.

 

Rnut-d ɣur-nneɣ..

 

Init i yimdukal-nwen.

 

Tanemmirt-nwen.

Tukkist seg ungal "Agezzan" n Paulo Coelho.

Iḍelli afaylu (fichier) word n ugezzan (162 isebtaren) iruḥ-iyi. Lxedma n wacḥal n wussan truḥ d aweḥwaḥ. Rfiɣ mačči s drus.. maca ass-a, ssawḍeɣ rriɣ-t-id s ttawil n yiwen useɣẓan (logiciel), ad s-d-yefk Yillu ayen yakk yessaram win i t-id-yesnulfan.
Ihi ilmend n tmendit-a-inu, nniɣ-d ad bḍuɣ yid-wen yiwen uḥric deg-s. ata ɣur-wen ihi. Ini-t-iyi-d tidmi-nwen.

Tanemmirt

Azekkuya deg iḍ, ilemẓi yewweḍ-d s uεudiw zdat n uqiḍun n Ugezzan. Yegguni kra sumek aneggaru-a i d-iban, ɣef uεudiw ula d netta, afalku ɣef tayet.
«Sken-iyi-d tudert deg uneẓruf, i yenna Ugezzan. Ala win i izemren ad d-yaf deg-s tudert ara izemren ad yafen deg-s igerrujen.”
Bdan tikli deg yijdi, s ddaw tziri. “Ur ẓriɣ ara ma zemreɣ ad d-afeɣ tudert deg uneẓruf, i ixemmem ilemẓi. Ur
εad ur ssineɣ aneẓruf.”
Ira ad d-yezzi ɣer Ugezzan i wakken ad yebḍu yid-s axemmim-a, maca yuggad-it. Wwḍen ɣer yiẓra-nni anida akken i ẓran ijudar-nni deg yigenni; tura ala tasusmi d waḍu i ten-yeččuren.
“ur ssawḍeɣ ara ad mlileɣ d tudert deg uneẓruf, yenna ilemẓi. Ẓriɣ belli tella, maca ur wwiḍeɣ ara ad tt-afeɣ.
- Tudert tjebbed-d tudert” i d-yerra Ugezzan.
Dɣa ilemẓi yegza-d d acu i d-yeqsed. Imir-nni yaka, yebra-yas i ṣṣrima n u
εudiw-is, win yebda acelweḥ akken i s-yehwa deg tlemmast n yidɣaɣen d yijdi. Agezzan yeṭṭaffar s tsusmi, ma d aεudiw n yilemẓi yelḥa akken-nni azal n uzgen n tamert. Sin yirgazen-nni, dayen tura, ur zmiren ara ad d-sekden tizantin n Umda, i sen-d-yegran ala tiziri-a tahuskayt d yiblaḍen i terra ttecruruqen amzun d lfeṭṭa. Taswiεt kan, ɣef tikkelt, ilemẓi iḥḥulfa s uɣersiw -is yeḥbes.
“Da, tella tudert, i yenna i Ugezzan. Ur s-ssineɣ ara tutlayt n uneẓruf, maca a
εudiw-iw yessen tutlayt n tudert.”
Rsen-d ɣer lqa
εa. Agezzan yessusem kan. Yebda yettmuqul deg yiblaḍen, akken d netta ileḥḥu s leεqel. Taswiεt kan, yeḥbes, yunez s lemḥadra. Yella din yiwen n ubruj deg akal, gar yiblaḍen; Agezzan iger afus-is, umbeεd yerna yakk iɣil-is, almi d tayet. Kra n tɣawsa tettembiwil, dinna iksar, u allen n Ugezzan (ur yezmir ad d-iwali ala allen-is) qqemcent, ayen i d-yemmalen afud i yesseqdec. Afus yettban-d am akken yettnaɣ d kra n tɣawsa sdaxel n ubruj-nni. Kra kan, s uxṭaf, i isxelεen amdakel-is, Agezzan yekkes-d iɣil-is, ibedd-d. Afus-is yeṭṭef-d azrem seg tjeḥlumt.
Ilemẓi yennexṭaf ula d netta, dacu kan ɣer deffir. Azrem yettembiwil yakk, ixdem-d zhir d uzefzef i igezmen tasusmi n uneẓruf. Aziɣen d afiɣer , ssem-is yezmer ad ineɣ amdan deg kra kan akka n tmercin.
Γur-k ssem-is”, i ixemmem ilemẓi. Maca Agezzan, i iskecmen afus-is deg ubruj, ad d-tafeḍ yettwaqqes yakan. Dacu kan, tafekka-s tettban-d d timgerrezt. “Agezzan ɣur-s snat n timad deg leεmer-is”, i d-yenna Uglizi. Ad t-tafeḍ yessen amek ara yeddu d izerman n uneẓruf.
Ilemẓi iwala amdakel-is yuɣal ɣer u
εudiw-is, yeddem-d takuba-ines taɣezzfant, iεewjen am wayyur, s yes-s yessuneɣ -d ameqyas deg lqaεa. Yesres azrem sdaxel umeqyas-nni, dɣa abelḥekkuc meskin yesbet din, ur yembiwel ara.
“Ur ttaggad ara, yenna Ugezzan. Ur d-iteffeɣ ara sya. Atan ihi tufiḍ-d tudert deg uneẓruf, d imli-a kan i sriɣ.
- Iwacu i s-tefkiḍ akk azal-ayi?
- Acku Tizumag atenta deg tlemmast uneẓruf.”
Ilemẓi ur yebɣi ara imi d-yesla i wawal n tzumag. Ul-is yuɣal ẓẓay d ameɣbun seg iḍazrin. Akemmel n unadi-ines ɣef ugerruj anamek-is yessefk-as ad yeǧǧ Faṭima.
“Ihi ad ak-d-ssekneɣ abrid deg uneẓruf, i s-yenna Ugezzan.
- Riɣ ad qqimeɣ deg Umda, i d-yerra ilemẓi. Mlaleɣ d Faṭima. U ɣer ɣur-i nekk tif agerruj.
- Faṭima d yelli-s n uneẓruf. Teẓra belli irgazen yessefk-asen ad ruḥen, i wakken ad zemren ad d-uɣalen. Nettat tufa-d yakan agerruj-is: d kečč. Tura atan tettraju-k kečč ad tafeḍ ayen ɣef wacu i tettnadiḍ.
- I ma yella ɣetseɣ ad qqimeɣ?
- Ad tuɣaleḍ d Anesɣamu n Umda. Ad tes
εuḍ aṭas n ureɣ i wakken ad d-taɣeḍ taqeḍεit n lεali n ulli d yileɣman. Ad taɣeḍ Faṭima, ad tidirem d imendiyen aseggas-nwen amenzu. Ad tlemdeḍ leḥmala n uneẓruf, dɣa ad tissineḍ, yiwet s yiwet, xemsin igimen-nni n tzantin. Ad tegzuḍ amek i d-gemmunt, ad k-ǧǧent ad twaliḍ amaḍal ur iḥebbsen ara abeddel. Ihi, ad tuɣaleḍ simmal tessneḍ ad tessefruḍ imlan, acku aneẓruf d netta i d aselmad ameqqran, yifen akk iselmaden.
“Aseggas wis-sin, ad d-temmektiḍ tullin n kra ugerruj akken. Imlan, dɣa, ad d-ssugtent awal fell-as, kečč ad t
εerḍeḍ ur sen-tselleḍ ara. Tamusni-k ad teǧǧeḍ i nfeε n Umda d Imezdaɣ-is kan. Iɣellaten n iderma ad k-tt-id-ẓren d lemziya. Ileɣman-ik ad k-d-rnun sεaya d tezmert.
“Aseggas wis-kraḍ, imlan ad kemmlen ad k-d-ssawalen ɣef ugerruj-ik d Tmacahut-ik Tanewrikt. Ad tewwteḍ uḍan d wuḍan d kečč d acali deg umda, u Faṭima ad tuɣal d tuḥzint acku abrid-ik, ɣef iddra-s, yettwagzem. Maca kečč ad tkemmleḍ ad tt-tḥemmleḍ, u tayri-a ad tt-myebḍum. Ad d-temmektiḍ belli werǧin tessuter-ak-d ad teqqimeḍ, acku tameṭṭut n uneẓruf tessen ad traju tuɣalin n urgaz-is. Ur tt-tettlummuḍ ara ihi. Maca ad telḥuḍ, uḍan d wuḍan, gar tezdayin, kečč ad s-teqqareḍ lemmer tkemmleḍ abrid-ik, lemmer tgiḍ taflest deg tayri-ik i Faṭima. Acku ayen i k-yeǧǧan teqqimeḍ deg Umda, d tugdi kan i tuggadeḍ ur d-tettuɣaleḍ ara. Mi ara d-tawḍeḍ ɣer da, imlan ad k-d-mlen belli agerruj-ik tesseble
ε-it lqaεa.
“Aseggas wis-kuz, imlan ad k-brun, acku ur sen-tesliḍ ara. Iɣellaten n iderma ad fiqen s waya, dɣa ad k-kksen amkan-is deg Usqamu. Ad tuɣaleḍ ihi d amzenzu amerkanti, ad ilin ɣur-k ileɣman d yilzuzen s waṭas. Maca ad tewwteḍ ayen i k-d-yegran deg ussan-ik d kečč d amlaweḥ deg tlemmast n tzantin d uneẓruf, d kečč teẓriḍ belli ur tewwiḍeḍ ara ɣer Tmacahut-ik Tanewrikt, u tura dayen ula i txedmeḍ, teǧǧa-k tmacint.
“Mebla ma tegziḍ belli Tayri werǧin, ula d yiwet n tikkelt, tessebṭel yiwen ɣef Tmacahut-is Tanewrikt. Ma yella yeḍra-d wannect-a, ɣas ḥṣu belli mačči d Tayri n tidet, tin iheddren Tutlayt n Umaḍal.”
Agezzan yesfeḍ ameqyas i d-yessuneɣ deg yijdi, afireɣ yerwel s lemɣiwla, yeffer gar yiblaḍen.
Ilemẓi yemmekta-d imzenzi-nni n ukbal, win akken-nni i iran ad iẓur Mekka, yemmekta-d Aglizi i ittnadin Agezzan. Yemmekta-d yiwet n tmeṭṭut i is
εan taflest deg uneẓruf, dɣa ula d aneẓruf-a ur tt-iɣull ara, yiwen wass yewwi-yas-d win akken i tessarem ad t-tḥemmel.
Ulsen talluyt ɣef i
εudiwen-nsen, tikkelt-a d ilemẓi i iṭṭaffaren Agezzan. Abeḥri yegla-d s imesla seg Umda, dɣa yeεreḍ ad d-yefrez taɣect n Faṭima. Ass-nni, ur iruḥ ara ɣer lbir, ɣef iddra n ṭṭrad i yellan.
Maca, deg iḍ-a, imi yella yettwali deg uzrem sdaxel n umeqyas, amwan yessebhaten, s ufalku-ines ɣef tayet, yemmeslay-as-d ɣef tayri d igerrujen, ɣef lxalat n uneẓruf d Tmacahut-is Tanewrikt.
“Ad dduɣ yid-k”, yenna ilemẓi. Dɣa, imir-nni yakan, yeḥḥulfa s wul-is tesdeɣ-it talwit.
“Ad nruḥ azekka send alluy n yiṭij.”
D ta kan i d tiririt s wacu i s-d-yerra Ugezzan.



Amawal:
Aɣersiw: animal
Amda: Oasis
Afiɣer: naja, cobra d’Egypte
Ssuneɣ: dessiner
Abelḥekkuc: réptile
Timrect, timercin: minute(s)
Tanewrikt: personnelle
Tizumag: Pyramides
Taflest: confiance

...atg

© Sma
εil Σabid

 

 

Att'anen s teqbaylit

Maladies et autres : Aṭṭanen d wayen nniḍen.

(tukkist seg "Amawal ameẓyan n tussniwin n ugama" n Omar Kherdja)

 

Abcès : Aqeẓẓul ; ḥibub.

Abcès sous le pied : Asegri

Accès de fièvre : rdez ; seṛğef.

Acné : Ḥebbecbab.

Adénite (glande adénite) : awlessis ; awles ; lwelsis; tasegrut.

Ampoule (callosité) : Tacelfuxt (pl : Ticelfax) ; Taderrit (pl : Tiderra) *

[* Ce mot a un autre sens : il s’agit d’une pierre, généralement celle enfoncée dans le sol devenant par là un obstacle qui peut déséquilibrer quelqu’un qui marche.]

Amygdales : Tiwermin : (sing : Tawremt).

Anneau de ténia : Tidli.

Anneau de ver solitaire : Iqileḥ.

Anémie : Tajγuγut.

Anémie du mouton : Tajγuγut ikerri (Il y a beaucoup de touristes qui l’attrapent aux Indes).

Anthrax : Abudec ; Timmist.

Aphte (des enfants) Aqemmuc.

Asthme : Akuffir ; Buneggaf.

Blessure : Agges ; Ifeddix.

Borborygme : Tadxemt.

Bronchite : Abezder (Chaoui).

Calamité : Tawaγit.

Cancer : Tikbert.

Cataracte : Calwaw.

Cautères : Tiqqad.

Cécité partielle : Butellis.

Champignon : Tifiri.

Chancre au visage ou écrouelles : Axenzir.

Chassie : Tirti (pl : tirtaw).

Choléra : Buzerregṭu ; Taburdit.

Cirrhose du foie Takunfa n tasa.

Coagulation : Idri (coaguler : dri).

Colique : Ṭiεna ; Taεdest ; azbar (pl : tuzbirin).

Conjonctivite : Tindaw.

Constipation : Tabuqemmaḥt.

Contraction abdominale : Amur.

Contusion : Afedxux ; Ifedxix.

Convulsion :  Axbibeḍ ; butummaẓ.

Coqueluche : Bumellal ; Tasaεqit; Tusutεiq; lεawaya.

Cors : Amesmar.

Crampe d’estomac : Tameḥḥaqt.

Crampe musculaire : Wejjir.

Crise : Ajenniw ; Tazγent.

Déchirure musculaire : Tisfi.

Diarrhée : Aberriḍ; Busiq; Buẓeεka; Tagḍiṭ.

Diarrhée chronique : Buselleqlaq.

Douleur intestinale : buniẓuwi; tinuẓliwi.

Diphtérie : Awremɣuc ; Taxerxurt.

Douleur : Ṣiḥ; Taqriḥt.

Dysenterie : Aεṣar ; Iẓmig.

Dyspepsie : Tamagirt.

Eborgner : Asmundel.

Eczéma : Anezyuf ; tafura, tafuri (I. Oumezdakal, Ihahan).

Enflure : Abibiḍ.

Enflure des paupières : Acelweḍ.

Engelure : Agris ; Qurrif.

Entérite : Buferda.

Entorse: Aleɣẓem ; Aneftel.

Eructation : Agergeε ; Agurreε .

Essoufflement : Tagafayt.

Estropié ; infirme : (adj.) : akucam [rendre infirme : ckucem (f.f) ; kucem : être infirme (type sker)].

Eternuer : tinzi.

Eternuement : Aεḍas

Etouffement : Aqbar.

Etourdissement : Asnaxi.

Evanouissement : Adewwex ; Lɣeṭ.

Epilepsie : Tamimunt ; aslli.

Fièvre : Tawla.

Fièvre articulaire des tropiques : Tawla n tḥekka tzenna.

Fièvre comateuse : tawla tasnaxit.

Fièvre jaune : tawla tawurγant.

Fléau : Tasakrart.

Foulure ; luxation : Aleɣzem ; anuγẓem.

Gale : Ajeǧǧiḍ.

Ganglion (enflé) ; aine :  Cufmejjir ; Cufṭengel ; awelsis.

Gangrène : Tabeεεuct ; Tassust.

Gémissement : Anazeε ; Enzeε ; tindra (nom verbal).

Gerçures : Ṣṣer.

Gerçures des ongles : Bunettaf.

Goitre : Agaẓuẓ; Ageẓ ; Aɣ ebel; Aḥeẓqul ; aḥengur ; agergur.

Goutte : Tejlec ; (yejlec, attan tebda-t-id deg ifassen : il est attaqué par la goutte et la maladie l’a entamé par les mains)

Guérison : (n.v. de jji) : Ḥellu ; ujwi ; tujwit.

Héméralopie : Calwaw.

Hémorragie : Siq ; asemmiḍ.

Hémorroïdes : Lembaser.

Hépatite : Siwriɣ ; Nannas.

Hernie : Abaεjuj ; Lbeεj.

Hérédité : Taḥnayt.

Hoquet :Tiḥiṭect ; tiḥirqect ; tiqs [avoir le hoquet : teṭṭef-it tḥiṭect].

Hormones : Insigman.

Humeurs épaisses : Axentellis ; Azerdum.

Hydropisie : Lεella.

Impétigo : Abiba

Infection : Tamsalmit.

Inflammation du nez : Xancar.

Inflammation de la prostate : Abaɣuḍ.

Kyste : Irsuhin.

Leucémie : Tiqiṭ.

Lèpre : Taleṭṭaḍit (d’où taleṭṭaḍ : l’auriculaire) ; Tterka ; nejdam.

Lépreux (subs.) : Aleṭṭavi ; anejdam.

Maladie contagieuse : Aṭṭan azegrar.

Maladie du muguet : Buyefrax.

Malaria : Taγḍala.

Méningite : Ṭaglal ; Taserda.

Myope : Adaεmamac.

Myopie : Timzaεwent; Tizunezt, tizeḥwelt

Migraine : Lɣeṭ.

Névralgie : Naqsa (a-t-il le même sens que le mot latin nexus : les joints ?).

Nerveux : Urnan.

Nervosité : Tagernint.

Ophtalmie : tamaḍunt n wallen.

Orgelet : Illeḍ ; illiṭ.

Paludisme : Agurri.

Paralysie : Karaf ; Aduyyet (Aurès) .

Peste : Tazelleḥlaḥt.

Plaie : Tifidi.

Plaie gangrenée : Iweṭ.

Pleurésie : budark.

Pneumonie Aḥerḥur.

Point de côté : Tineggist.

Pus : Arṣeḍ

Pyrosis : Wazi.

Quinte : Ageḥguḥ ; akeḥkuḥ.

Rachitique : Aεekac.

Rachitisme: Adexcim ; Adexmic.

Rage (subs.): Isiḍ; Tusḍa .

Râle: Takerkra ; Asḥijjew.

Rot : alza.

Rougeole: Tabuzeggaɣt; berziwn ; buḥamrun.

Saigner du nez : Afunzer ; munzer.

Scarlatine : Tifidugt.

Sciatique : Zellum.

Scorbut : Afugmas.

Syphilis : Taberṣi ; bibuc.

Taches de la peau : Tiberbect (à ne pas confondre avec Tiḥebḥect à pl : Tiḥebrac : grain de rousseur).

Taie de l’œil : Ameḥrac; Itri ; amḍellu n wallen.

Teigne : Tiferḍest ; tamejjuṭ.

Teigneux ; chauve (adj.) : Bufarḍas ; amejjuḍ (pl : imejjaḍ).

Tremblements nerveux (qui a des…): Butargagayt ; bufelj.

Tourniole : Ṭelmejj.

Toux ; rhume : Takuḥut ; Tusut.

Tuberculose: Aberdiw.

Typhus: Taḥbubt.

Typhoïde : Taxennaqt.

Lire la suite

Arraz wis-sin deg Temsizelt "Taddart zeddigen" di Bgayet yughal-d i taddart n Tiwal

 

Ayyuz i taddart n Tiwal !!!

Taddart n Tiwal tewwi arraz wis-sin deg Temsizelt "Taddart neɣ Tamdint i zeddigen di Bgayet". Araz d amelyar d snat n twinas imelyan n isanṭimen.

Nessaram tuddar n Yiqbayliyen yakk ad uɣalent yakk d Tiwalat, d tizeddganin, d tid ara yernun cbaḥa i tudert.

Ayyuz ihi i Tiwal.

 

Anfafad (virus) A (H1N1)

Aḍu A (H1N1) ( i tsemma di tazwara Tuddsa tamaḍlant n tezmert Aḍu n yilfan) d yiwen n waṭṭan admar qessiḥen yettenṭaḍen (maladie respiratoire aigüe contagieuse), i d-yettεeddal yiwen seg infafaden (virus) n waḍu A, win iwumi qqaren Influenzanfafad A adu-tawsit (sous-type) H1N1, i d-iεawden tuffγa deg 2009 s yiwet n talγa tacetlant (génétique) tamaynut yettenṭaḍen seg umdan γer umdan. Aḍu-a tesεa daγen ismawen nniḍen, i s-fkant tuddsiwin tigreγlanin yemgaraden, am aḍu agafa-marikani, aḍu amiksiki neγ aḍu amaynut send OMS ad as-teg isem n waḍu A(H1N1) ass n 30 yebrir 2009.

Influenzanfafad A adu-taswit H1N1

Influenzanfafad A adu-taswit H1N1

 

Anfafad-a amaynut n waḍu, yesεan tictiltin (gènes) n waṭas n infafaden yettwassnen yesεan aẓar uḥelluf, n yuẓaḍ d wemdan, d anfafad amexluḍ. Ula d yiwet n ticreḍt (vaccin) mgal-is, u imassanen n OMS ur ẓrin ara ma yella ticraḍ yellan akka tura mgal aḍu asemhuyan (grippe saisonnière) zemrent ad as-d-xedment ẓerb neγ uhu. Wid γef wacu i d-yettbin waṭṭan n waḍu A(H1N1) ttdawin-ten tura s imqurεa (inhibiteurs) n neuramidase n infafaden n waḍu am oseltamivir neγ zanamivir

Walit Islandiyen ay Iqbayliyen

 

http://www.tlfq.ulaval.ca/axl/europe/images/islandedrap.gif

Tigduda n Island

Island

Lýðveldið Ísland

Tamennaγt: Reykjavik  
Imezdaγ: 276 000 (1998)
Tutlayt tunṣibt: tislandit 
Taggayin yugten: Islandiyen (98 %) 
Taggayin tidersiyin (minoritaires): kra n trebbuyaε timecṭuḥin n iminigen
Anagraw asertan: tigduda tadukklant
Imagraden imendawiyen (tutlayt): Ula d yiwen umagrad ulac-it deg Tmendawt n 1944

Isaḍufen isnilsanen: Asaḍuf γef isensuyen d imukan usečči (1985) ; Asaḍuf γef temsulta (1996); Asaḍuf γef yismawen n yimdanen (1996); Asaḍuf γef temkarḍiwin (1997); Asaḍuf γef radyutinezwit (radiodiffusion) (2000); Asaḍuf γef iberraniyen  (2002); Aslagen (règlement) γef iberraniyen (2003); Asaḍuf γef igatuyen n usenkid (contrats d'assurance) (2004); Asaḍuf γef uselkem (exécution) n izarafen (jugements) (2005).

 

1 Tafesna tarakalit (situation géographique)

Carte : Islande

Tigduda n Island d tigzirt n ugafa n ugaraw Aṭlanṭi  (océan Atlantique) i d-yezgan gar n Gruland d Ecosse. D yiwet n tmurt tigzirit n 102 800 km² , tannuda (équivalant) n tjumma n Kuba, krad (03) tikwal tijumma n Belgique (30 527 km²), Wis-semmus (ciquième) n Franṣa (544 000 km²) neγ wis-kuz n umendi (province) n Lqaεa-Tamaynut (402 000 km²) di Kanada.

 

Lire la suite

Akaram (dossier): Aglim

Iγeblan-a n weglim γef wacu i nettseḍḥi ad d-nesmmeslay.



Tettγanzim-t cwiṭ neγ tettseḍḥim yes-s, aṭan-a n weglim yuγal-awen d aγbel meqqren maca ur tesεim ara tabγest ad temmeslayem fell-as ? Attherri n dwaxel, tifiḍliwin, ančaw n tfednin neγ tukbert : atentad 10 n tririyin, mebla aneḥcem, i wakken a wen-d-fkent afus n tallelt.


1) Sεiγ tiεeqqayin deg wudem-im, d nekk ugareγ 30 iseggasen, acemma ur yelli fell-as ?


Seg kra n wussan akka, tiεeqqayin d timecṭuḥin bdant ttbinent-d, u ttuγalent-d dima, γef wudmawen-nwen. Yerna seg wacḥal-aya imi tεeddam i wannar n tanuba (stade d’adolescence), dγa tewḍem yakk 30 iseggasen. Tebdam tkemcem ula γer tama n wallen-nwen. Tiεeqqayin deg wudem rnu-yas akmac deg allen, annect-a yessebhet-iken, u tesseqsayem iman-nwen ma yella s tidet acemma ur ken-yuγ.

Tiririt, xerṣum s tmuγli n tussna n weglim (dérmatologie), d IH. Di tilawt, mgal wayen nuγ tanumi nsell-as tiεeqqayin n wudem (acné) ttmagant-d ala i yinubiyen (ados), 20% seg tulawin yugaren 25 iseggasen sεant tiεeqqayin deg udmawen-nsent. « Ulac tilisa, i d-iwekked umusnaw n weglim Henry Pawin. Tiεeqqayin-a zemrent ad d-bdunt seg 7-8 iseggasen neγ ur d-ttbinent ara, γer lxalat, alma ḥebsent tarrawt.» Isufar n ussejji ara wen-d-yefk umejjay kifkif-iten am wid i d-yettak i yinubiyen. Dacu kan, di tuget n tikwal, isufar-a qeddcen qell γer imeqqranen.
S umata, tiεeqqayin n yinubiyen teffγent-d meḥsub deg tama ufella n wudem (ayendur d nwaḍer). Γer imeqqranen, ad d-nini d aγesmar d tamart i tent-yettaγen, neγ ameggaḥ (aεenqiq) yakk yezmer ad yeččar s tεeqqayin d timecṭuḥin.
Mi ara tekfu tallit n wawaḍ (puberté), d tulawin i yettḥazent s waṭas tεeqqayin-a ugar n yirgazen, isniflen ihurmuniyen (changements hormonaux) ggaren-d iman-nsen s tidet deg weγbel-a n weglim. Dγa, meγγi n tεeqqayin-a meḥsub yezga yettili-d s kra n wussan kan uqbel mi ara d-ffγen idammen n waggur. Nettaf-itent-id daγen s tuget deg wussan-nni n tarrawt.
Kra n ismektiyen kan i wakken ad nessenqes deg unezgum, i ken-yeṭṭfen yakan aṭas deg ussan-nni n uγerbaz.
Ur sṭerḍiqet ara tiεeqqayin-nwen, annect-a yezmer ad yessimγer aṭan. Amejjay-nwen n weglim ad awen-d-yefk ahat asafar ara yekksen tiεeqqayin-nni tiberkanin, nutenti, ttkemmilent-as i waṭan n « acné ». Maca ur t-xeddmet ara iman-nwen uqbel ad teslem i yiwellihen-is ussnanen.

Ur sṭerḍiqet ara tiεeqqayin-nwen s yiman-nwen, aya yezmer ad tent-yessuḍen ugar


Acné ur d-yettas ara si lqella n tezdeg. Maca assizdeg yelhan yessenqas deg meγγi n tεeqqayin.
Ma yella tuḍnem s « acné », ur ssexdamet ara asafar i d-yeww rebbi, i d-tuγem s tidderγelt.
Tteqlaq yezmer ad yessemγi tiεeqqayin. Dγa, netta s umata diri-t i tezmert, ihi ma yella tzemrem ad tessenqsem deg-s, atan ad tafem iman-nwen axir.
Assexdem n tḥebbuyt n tarrawt (pilule) yezmer, s wefran, ad as-yernu neγ ad as-yessenqes i tuffγa n tεeqqayin n « acné ». εla ḥsab n tmuḍint d tewsit (type) n tḥebbuyt n tarrawt : ilaq ad tafeḍ tin γer wacu i tufiḍ. Yiwet n tifrat kan i yellan i weγbel-a, d aεraḍ d ubeddel deg tḥebuyin alma tufiḍ-d tin i m-yelhan. Ssuter tidmi n umejjay-im n tarrawt.


2)Attherri n ddwaxel (herpès génital), amek i d-yettas ?

Tezmreḍ ad d-tiniḍ γef tuttriwin am ta i nettnadi tiririt lεali, i wakken ad nekkes yakk anzgum s tidet. Maca, akken i d lbaḍna, nettxemmim snat (krad, kuz, mraw) n tikwal uqbel ad tt-id-nesteqsi i wumejjay !
Attherri n ddwaxel yettwassen s tcelfuḍin timecṭuḥin i yettemγayen s tuget sufella n dwaxel n wedan, wid n wergaz neγ n tmeṭṭut. Mačči kan qerriḥit, maca ur cbiḥent ara daγen, ssuffuγent-d ul mi ara tent-iwali wemdan. Attherri igemmu-d s uxatel : ad d-ibin, umbeεd ad yekkes kra n wakud akken-nni, syinakkin ad d-yuγal… Mačči d aṭan i yuεren s waṭas, ala γer yimdanen i wumi yefcel unagraw-s n temḥeddit (système immunitaire).
Isali n diri : Attherri n ddwaxel yettenṭṭaḍ BEZZAF. Isali iggerzen : am deg waṭas n waṭanat i yettenṭṭaḍen s tuzzuft, nezmer ad nesḥirbeb iman-nneγ fell-asen.
Uqbel kra yellan, yessefk ad teḥbseḍ akk assaγen n tuzzuft (rapports sexuels) d wemdan i yuḍnen mi ara s d-ttemγayent akken tcelfuḍin-nni, acku imir-nni i tessenṭad ugar.

Mi ara d-gemmunt tcelfuḍin-nni n uttherri, tif xir ad teḥbsem kra yellan d assaγ n tuzzuft i wakken ur tessenṭaḍem ara aṭṭan i wemedakel-nwen.


Asenṭeḍ yezmer ad yili mačči di tiswiεin-nni n meγγi n tcelfuḍin. Ihi, γef aya i yessefk ad tesseqdceḍ ticculiḍin n useḥbiber (préservatifs) ma tesεiḍ assaγen d wemdan i teẓriḍ yuḍen s uttherri neγ yakk d wemdakkel nniḍen amaynut.

Awelleh : annect-a yeεna daγen assaγen imi-ddwaxel… Ih, attherri n icenfiren yezmer ad yessenṭeḍ i ddwaxel, neγ d anemgal seg ddwaxel γer icenfiren (maca aya ur yugit ara aṭas).

Amihi (risque, danger) n ussenṭeḍ s tyemmat γer lṭufan yezmer ad d-yili ma yella tayemmat tessegmaw-d ticelfuḍin deg lawan n tarrawt. Ma mmi-s inṭeḍ-it-id waṭṭan, aya yezmer ad yili d amihi meqqren, acku anegraw-is n temḥeddit urεad ur yuγal d amellil (efficace). Ihi, yessefk ad teẓrem imejjayen uqbel tarrawt i wakken ad d-heyyin ayen yessefken


3)Tilkin zedγent kan deg uqerruy i yumsen ?

Meḥsub tikti-a tella yakk deg wallaγen-nneγ, tikti-nni i d-yeqqaren akken : tilkin ḥemmlent ammus. Dγa, ur s-neqqar ara belli wid yeččuren s tilkin ur zeddigit ara, ahat ur ssucfen ara seg wasmi d-tebda yamma-s n ddunit ? D acu-t unelkam (conséquence) i d-tessegray srid deffir-s wayen akka i nγil d tidet : mi ara ad yesεu yiwen tilkin deg uγerbaz, d tbehdila tameqqrant. Ad yettwiεzel imir-nni yakan, acku tilkin ḥemmlent ad ğellbent seg uqerruy γer wayeḍ.
Eyyaw ad nekkset tura yakan tikti-a i iqerrḥen aṭas n tsutiwin n inelmaden : uhu, tilkin ur ttwaqqnent ara γer lqella n tezdeg. Ulac yakk d acu i wumi neqqar aqerruy iḥemmlent tilkin : menwala yezmer ad tetnt-yesεu. « Tilkin tessent idammen n weglim yesεan anẓaḍen, i d-tessegza tmusnawt n weglim Marie-Estelle Roux. Akken yebγu yettmettat weglim yesεan anẓaḍen neγ ammus n ucekkuḥ (acebbub). Dγa, igerdan yuḍnen s tilkin qlilit wid yesεan acekkuḥ izzeyyet (yesεan zzit). » Maca d tidet, tilkin ḥemmlent acebbub aγezzfan wala agezzlan.

Uhu, tilkin ur ttferriqent ara gar icebbuben zeddigen d icekkuḥen yumsen : iḥemmel-iten yakk.



D acu i yezmer ad t-ig yiwen i wakken ad yeslek seg tilkin.
Ma yella mmi-twen yesεa acebbub d akemmlan, qqnet-as-t mi ara iruḥ γer uγerbaz. Ibeεεac imecṭaḥ ad afen iγeblan ma bγan ad idiren deg-sen
Slemdet-as tamsirt : Ur ilaq ara umyibdal n tcaciyin, n ikackulen neγ lastikat ucebbub.
Fernet-as aqerruy dima i weqcic-nwen, iwakken ad s-tgem ẓẓerb i waṭṭan uqbel ad yessiγ s tidet-is. Ma yella teğğim tilkin ad aγent amkan-nsent, atan ad ssefrurxent igimen (1000) n iwṭeṭṭen, wid ara d-yuγalen umbeεd d tilkin, tilkin-a ad d-slalent ula d nutenti iwṭeṭṭen, atg.
Γef wannect-a, dawit seg mi ara d-binen iwṭeṭṭen imenza (d nutni isehlen i tifin wala tilkin, acku d imellalen yerna ttγamayen deg yiwen n wemkan). Ssutret iwellihen n ufarmasyan-nwen neγ i umejjay-nwen.


Yettkemmil...

Targit: tasghunt s teqbaylit.

 

Ttekkit γef tugna-yi i wakken ad tzedmem tsγunt "Ah, lemmer ad nessiweḍ!"

Tifranin n tselwit

Tγile a γ-tekse ur newi

Ass n tẓa di yebrir,
d ass i k-d-yewwin γur-neγ.
Tγileḍ a γ-tekseḍ ur neẓwiṛ,
mi akken teskeεrireḍ fell-aγ.

Tusiḍ-d a γ-twaliḍ i γ-tenniḍ,
ax ihi ṣṣserf-ik, ṭṭef:
Ar ass-a widak tenγiḍ,
mazal-iten mmuten a Butef.

Terniḍ teqqleḍ d amaziγ,
tlemdeḍ-d γer ben Bella.
Teggulleḍ tḥenteḍ a ziγ
tamaziγt tugiḍ, tella.

Tenniḍ ad mmteγ di talwit
imi k-nerfed a sidi.
I d-turweḍ a taqbaylit
d-yesεan Weld Σli Lhadi.

Weld Σli lhadi, Zidan,
Muḥend Crif Ḥennaci.
Ḥemmani d wid akk yeddan
mi k-d-nefqen akken lγaci.

Ṣṣaleḥ bu rwayeḥ
yessawel i Weḥmimi
Ad necnu, ad necḍeḥ:
"Acimi? Acimi? Acimi?".


Ulac tifranin ulac,
tura nuki-d d tirni.
Tidderγelt yeddem-itt nεac,
itran qqlen s igenni.

(d yiwen i t-id-yerran deg "tedmiwin" γef tdiwennit n Ferḥat, ur d-yerri ara isem-is)

http://imyura.net/Timenza/tabid/57/articleType/ArticleView/articleId/527/Tile-a-tekse-ur-newi.aspx

 

 

Timucuha n warrac n Tiwal

Tiddukla Tadelsant Timettit

Tiγri n Tiwal

 

Tamacahut : Izem d uwtul

 

Sγur Masinisa Σabid

14 iseggasen

 

Zik-nni, deg umadaγ llan waṭas n iγersiwen. D izem i d aqerruy fell-asen, ttaggaden-t yakk.

Yal ass, itett yiwen deg-sen. Almi i d-tewweḍ nnuba n wewtul, iεeṭṭel ur d-yusi ara.

Yefqeε Yizem, yenna : « A d-yawweḍ γer da a t-gezreγ ».

Imi d-yewweḍ bu tmuẓẓuγin-nni, Izem isteqsa-t s wurfan : « Iwacu i tεeṭṭleḍ fell-i ? »

Awtul : Igzem-iyi-d yiwen n yizem abrid, d ameqqran annect n illat, yenna-yi « anida yella Yizem i ken-iḥeqqren akka ? »

Izem : Anida-t yizem-a i k-d-igezmen abrid ?

Awtul iwehha s wufus-is γer yiwet n tama, yenna: atan sdaxel n lbir-ihin.

Dγa imiren yakan izem d uwtul msaεafen γer lbir-nni.

Awtul : sejbu kan γer lbir ad tt-id-teẓreḍ

 

Izem yessejba, yeẓra-d udem-is suffell-a n waman. Irekkem wallaγ-is seg lefqaεat, yenwa d izem-nni γef wacu i s-d-yemmeslay wuwtul,  dγa ineggez γer daxel n lbir.

Seg wass-nni, iγersiwen n umadaγ ufan talwit akk d tudert n tmendit.

 

 

Tamacahut : ticγerbel

Sγur Meẓyan Nicar

12 iseggasen

 

Amacahu,

Zik-nni, tella yiwet n tmeṭṭut tesεa snat n teqcicin. Yiwet deg-sent d tarbibt-is. Yal ass ttruḥunt γer tala ttagment-d. Yelli-s tettak-as tazeεluqt, ma yella d tarbibt-is tettak-as aγerbal. Yal ma teččar aγerbal d aman, ttenγalen-d. almi d yiwen n wass, tefqeε, tḍegger aγerbal-nni. Tuggad ad as-tini yemma-s anida yella uγerbal. Dγa, tettbeε abrid yeṭṭef uεerbal-nni. Tetteddu tetteddu almi d-tufa yiwen n umeksa, testeqsa-t.

Tarbibt : Ay ameksa, ur teẓriḍ ara anida i iεedda uγerbal ? 

Ameksa : Err-iyi-d qbel lmal-iw, ad akem-d-iniγ anid iεedda.

Tarbibt truḥ terra-yas-ten-d.

Ameksa : ihi, iεedda γer wexxam n tteryel, maca ad akem-weṣṣiγ, ma yella tenna-yam-d « ad akem-ssukkeγ seg tewwurt neγ s tzuliγt ? », ini-yas « s tzuliγt ». Ma yella tenna-yam-d « ad akem-d-ssuγ leḥrir neγ tazeggart ? », ini-yas « tazeggart ». Ma yella tenna-yam-d « ad akem-d-ččareγ aγerbal-im d tiwiztin neγ d tiγredmiwin », ini-yas « d tiγredmiwin ».

Imi tewweḍ γer wexxam n tteryel, tteryel testeqsa-tt.

Tteryel : ad akem ssukkeγ s tewwurt neγ s tzuliγt ?

Tarbibt : S tzuliγt.

Tteryel tessukk tarbibt-nni s tewwurt.

Tteryel : ad akem-d-ssuγ leḥrir neγ tazeggart ?

Tarbibt : S tzeggart.

Tteryel tessa-yas-d leḥrir, dγa ṭṭsent.

Azekkuya tifawt (taṣebḥit) :

Tteryel : ad akem-d-ččareγ aγerbal-im d tiwiztin neγ tiγredmiwin?

Tarbibt : D tiγredmiwin.

Tteryel teččur-as-d aγerbal-is d tiwiztin.

Imi tewweḍ tarbibt γer wexxam, teḥka-yasen-d amek i d-tewwi annect-nni n twiztin. Tameṭṭut d yelli-s usment.

Tameṭṭut i yelli-s : A llah a llah ! tarbibt-iw teččur-d aγerbal d lwiz, kemmi ur d-tewwiḍ kra !

Yelli-s n tmeṭṭut teffeγ s lefqaεat, deg wufus-is aγerbal. Deg tala, tdegger aγerbal war ma teẓra anida yerra. Tetteddu tetteddu almi i tufa ameksa-nni i tufa akken terbibt-is, tseqsa-t.

Taqcict : Ay ameksa, ur teẓriḍ ara anida i iεedda uγerbal ? 

Ameksa : Err-iyi-d qbel lmal-iw, ad akem-d-iniγ anid iεedda.

Taqcict : S tudert ur k-ten-d-rriγ.

Ameksa ur s-d-yenni-yara anida yerra uγerbal.

Teqqim teqcict iman-is tettxemmim amek ara d-taf tifrat. Temmekta-d belli tarbibt temmeslay-as-d γef wexxam n tteryel. Tuzzel imiren yakkan γer dinna. Tewweḍ deg iḍ, tekcem γer wexxam n tteryel.

Tteryel : ad akem-d-ssuγ leḥrir neγ tazeggart ?

Tarbibt : Uhu ! Nekk ssu-yi-d leḥrir .

Tteryel tessa-yas-d tazeggart, dγa aglim-is yakk yettwacrew.

Azekkuya tifawt (taṣebḥit) :

Tteryel : ad akem-d-ččareγ aγerbal-im d tiwiztin neγ tiγredmiwin?

Tarbibt : D tiwiztin.

Tteryel teččur-as-d aγerbal-is d tiγredmiwin.

Tteryel : ad akem ssukkeγ s tewwurt neγ s tzuliγt ?

Tarbibt : S tewwurt.

Tteryel tessuk-itt-id s tzuliγt. Dγa taqcit temmut.

 


Visit Aru taqbaylit

Créer un site gratuit avec e-monsite - Signaler un contenu illicite sur ce site